تحجبت واني زغيرة والمشكلة لما حجبني خلاني البس الحجاب بالبيت همات، حرفيا جان كل النهار براسي حتى لما انام واذا يوم نزعته امشط مثلا ،اذا دخل ابوي او اخوي ارجع البسه، واني جنت ما اعرف عبالي فرض حتى بالبيت، سبع سنوات اني البسه بالبيت.
الة صديقاتي گالن ماكو وحدة تلبس حجاب بالبيت، انصدمت، گلت بنفسي هن صايعات 😂، وبعد سنتين كمت شوية شوية انزع الحجاب بالبيت، ابوي جان لما يشوفني نازعته يگول شلون تنزعينه گدامي! لانه ببساطة تعود، حتى امي محجبة بالبيت دائماً.
اما حاليا اني نازعته طول الوقت بس لما اطلع البسه،ابوي منعني من هواي شغلات من الصغر باسم الدين، هو صراحة منعني بسبب العيب بس جان مغلفها بالدين لان يمشي علي، من جنت زغيرة مانعني من البايسكل بحياتي ما ركبت بايسكل حدي جنت العب بيه الحديقة الداخلية، جان عمري ٨ سنين ويگلي ما يصير البنية تركب بايسكل، وبنفس الوقت منعني من اي لبس قصير او بنطلونات جان يگلي حرام، ومن ذاك السن يخوفني بالحرام ، هسة حرام افتهمناها بس جنت بگد القندرة اني والحرام شنو. ابوي كرهني بابو الدين من فتحت عيوني عالدنيا يغلط على اهل امي ويريد منها تحترم، ويگول مهما يسوي الزلمة يبقى زلمة وانتن نسوان، وبعدها يذكر اقتباسه المفضل "الرسول يگول لو كان لأمرء ان يسجد لغير الله لأمرت الزوجة ان تسجد لزوجها!"،وهسة اني عندي اعلى درجات التعقد من الزواج ،افضل ابقى يم ابوي ولا اتزوج احسن زلمة بالعالم، بسبب عقليته التعاظمية جان يشوف نفسه نبي، معصوم من الخطأ، حتى ما يقبل نناقشه رأسا يعتبرها قلة احترام، كلشي ولا يحس بالتهديد على قدسيته،لانه شايف نفسه ملك العائلة، ودائما يگول شنو فايدة بناتي وزوجتي اذا ما يخدمني! هاي عدى انه بخيل، هوايته يجمع فلوس ، جمع ٢٠ مليون من راتب ٥٠٠ الف باربع سنوات، وما يحتاج اكللكم شلون عيشنا بهل فترة، يمارس علينا اعلى درجات الشح، حتى جنا نخاف نطلب منه ربع دينار، احتياجاتنا خارج الأكل والشرب يشوفها ترف زايد.
اضافة انه عصبي بشكل مرضي، وعايش على المهدئات ، وما يشارك باي شكل من اشكال التربية عدى التربية السلبية التلقائية ،لانه يشوفها وظيفة الأم، ودائما يتعارك وية امي ويسبها بدون سبب.
هاي سلبياته، واكيد هو عنده ايجابيات لانه ما جان دائماً بهذا السوء وم ات يظهر جانب ابوي ، بس اتسائل اذا طيبته ويانا مرات سبب كافي انو انسى كل مساوئه.
دائما احس بالذنب لمن اكتب عن ابوي وارجع احذفه لان احسه مثل الأغتياب، بس ما اگدر اجذب على نفسي ابوي من افشل النماذج الأبوية والزوجية. والمفروض شخص مثله ما يتكاثر، وهسة احنا اطفاله اغلبنا عقد نفسية وروابطنا ضعيفة، وتاليتنا راح نكاثر هذا النسل الفاشل.
كم شخص هنا عنده عقده من ابوه؟
